جنون امراة

لسلام عليكم ورحمة الله وبركاته

عندي سالفه استوت لي . والله ما عرفت اتكلم فيها ويا حد .. قلت انزل الموضوع هني .. وعساكم تفيدوني ..

قصتي يا اخواني ويا اخوات .. انا قبل فترة بسيطة تعرفت ع شخص عمري 23 سنة .. اعجبت فيه واعجب فيني .. المهم ما حبيت اطول الموضوع .. وقتله لو تباني يا ولد الحلال تعال بيتنا وحياك .. قالي اوك هذا شرف لي .. يعني عطاني وعود وكلمة .. قبل كم يوم طلب مني فلوس ومحتاجنه وقالي سلفيه وبردلي .. انا ما ترددت وقلت اسلفه .. ووعدني يرد لي .. المهم امس اتصلت فيه ولا اشوف حرمة ترد انحرجت وسكرت .. قلت يمكن تشابك خطوط او شي .. المهم طلعت الني ادمة هذي زوجته وتقولي شو تبين في ريلي .. متخيلين الموقف .. يعني فعلن موقف لا احسد عليه وغبي وشوي وبتخبل .. اكييد بعضكم بيقول غبيه كيف سلفت حق واحد ما تعرفه .. بس فعلن انا كانت من باب نيه صافيه وسلفيه ... ما حسيت انه يالس يلعب علي او شي ..

المهم حاليا .. انا ابى فعلن اقدم شكوى للشرطة فيما يتعلق ببيزاتي ابى اردهم .. بس بنفس الوقت طبعا ما ابى حد من اهلي يدري بشي او يحس حته .. ما فيني ع الفضايح .. والمشاكل .. جد ابى اعرف اذا في شرطة تقدر تحل الموضوع بطريقه وديه دون تدخل ولي الامر او شي من هالقبيل .. ثانيا انا انهنت بطريقه كبيرة .. حرمته تطرشلي مسج اطلع من حياة ريلي ما تفهمين .. تيب هو قالي انه مب متزوج ونيته صافيه وعندي مسجات تؤكد ع هالكلام ..


اسئلتي :-

- هل فعلن الشرطة بتردلي بيزاتي من هالانسان من غير تدخل حد من اهلي وبخصوصيه تامة
- وهل بيخلوني افتح قضيه ولا كيف ... ولا الامور بتنحل بودية

شو تنصحوني اسوي والله حاسه بقهر وظلم وحاسه اني غبيه وانقص علي .. بالله تردون علي

اسفه اني طولت عليييكم سامحوني

موظف مدفون

يفيدونج الاخوان من الناحيه القانونية


من ناحية اخرى

انا اقول لاتبهدلين نفسج فالمراكز ودام المسالة عدت على خير بدون اي ضرر لج غير الفلوس

انسيها والله يعوضج ولاتنسين انه ماعندج اي دليل انج سلفتيه ولاتنسين فالتحقيق بيسألونج شو صفتج وكيف تعرفينه والخ



استري على نفسج الله يستر عليج

موفقه

علي الراعي

الأخت الكريمة
كيف تم تسليمه المبلغ
وكم قيمة المبلغ

من عَفَّ عن ظلم العباد تورعا..جاءته ألطاف الإله تبرعا

تحذير
إذ تحذر إدارة المنتدى أعضاء المنتدى الموقرين أن جميع الخدمات داخل المنتدى مجانا ولوجه الله ،
كما أننا نؤكد على أن تعامل أعضاء المنتدى مع اى من المستشارين القانونيين أو المحامين الأعضاء خارج حدود المنتدى بمقابل او بدون لأى من الخدمات فالمنتدى ليس مسؤولا عن هذه التعاملات ،

خالد سعيد

الشكر الجزيل للاخ موظف مدفون

المحامى خالد القانون الجزائئ والاحوال

sami

السلام عليكم

اختي ليش ما تتواصلين مع خدمة الامين

يا طعن سيفك لي انحد في معنقي .... طعنة كلامك وجروحي فزديادي ...يا مظلمك يا صاحبي المتساهي

لين طلبت مني طلبة المحالي...(آه)مني سمعتها وجنك غروقي...في منامك أو أنت في صموخي

محمد ابراهيم البادي

اعيد قول الاخ سامي
التواصل مع خدمة الامين في شرطة دبي بيكون يها ستر اكثر

جنون امراة

مشكوووورين اخواني الاعزاء ع الردود والحلول ..

عسى ربي يفرج عنكم كرب الدنيا والاخرة

ان شاءالله ربي بيفرجها

خالد سعيد

هاي قضية مدنية (رفض اعادة الاموال التى اخذت علي سبيل القرض )
ما يخصها بخدمة الامين ,
المحكمة المدنية هى المختصة . فاذا كان المبلغ كبير , توكل محامى و خلاص يعرف شغلة .

خدمة الامين : اذا وحدة تعرضت لعملية تهديد او ابتزاز , وتريد حل المشكلة بطريقة سرية .
مثال : واحد ماسك حاجة على وحدة , ويبتزها يا تنفذ طلباتة او ينشر الفضيحة .

المحامى خالد القانون الجزائئ والاحوال