موقف تعرضت له بعد صلاة الجمعة

[فيصل الحوسني]

السلام عليكم ورحمة الله وبركاته،،،


بغيت أستشيركم وأطلب منكم الرأي بخصوص موقف صار لي في صلاة الجمعة ،،، وأتمنى الإفادة سواء من ناحية إن كان الكلام اللي قلته غلط أو أسلوبي في الموقف ..... الخ


الموقف

في الركعة الثانية في الصلاة طفل يصيح " بابا ،،، بابا، ويصيح " قلت أكيد ضيع ابوه ومب عارف وين ابوه وطبعا أكيد انشغل جميع المصلين بالصوت يعني أثر ع صلاتهم

خلصنا الصلاة وع طول رحت لمصدر الصوت عشان أشوف الياهل وأهديه لين ما يشوف ابوه " يعني الحركة كانت عفوية " وإذا بأحد المصلين يطالعني ويقول

:" منو ابو هالولد قطع علينا الصلاة الياهل "


رديت عليه بصوت عادي وفيه نبرة من الالتماس العذر للطفل :" هااا ياهل ما يعرف "

رد عليه: " انته ابو الياهل "

قلت له :" لا مب انا ابوه "

رد وقال:" العتب مب ع الياهل العتب ع ابوه اللي يابه المسجد"

رديت عليه - وكان ابو الطفل شايل ولده وما قدرت اشوف ويه ابو الولد او الولد نفسه - ولكن صوتي هالمرة كان اشويه اقوى من قبل :" عادي ما فيها شي وين المشكلة ابو الولد يبا يعلم ولده الصلاة ويراويه كيف الناس اتصلي "

رد عليه ونبرة الشخص انه هاللي يصير غلط :" اهو قطع علينا الصلاة وليش كل واحد ييب عياله ويخربون علينا الصلاة ".

رديت عليه بنبرة قوية وفيها نوع من التحدي :
" كــيـــف ؟"

رد عليه: " احنا يايين اهني نتعبد "

رديت عليه :" يا خي اتعبد منو ماسكنك " وفي هالمرة رفعت يدي وأشرت له

طبعا اهو طلع معصب وبعدها المصلين يقولون لنا : " اذكروا الله ، حصل خير .... ومن هالكلام "

طلعت من المسجد مب مستوعب الموقف وكان احدهم يتمتم بعبارات التهدئة : " صل ع النبي ..."

بدون تفكير قلت خلاص انا المرة اليايهـ بودي ولدي الكنيسه خل يتعلم الصلاه ،،، واحد من المصلين ابتسم لي وهو ينظر وطبعا رحت افكر في الموقف ومب عارف هل الناس ما تتقبل اليهال في المسجد،، صح انه ازعاج بس هل علاج المشكلة بهاي الطريقة....


طبعا اللي عنده ولد بيعرف شو معنى انه ولده يصيح وهو يصلي اما اللي ما عنده اكيد ما بيعرف



وفي انتظار تعقيبكم ع الموضوع وهل اللي انا سويته او قلته خطأ ؟؟؟!!!! واتقبل انتقاداتكم بصدر رحب

[حــمــد الكعبي]

انا من رآي ،، انه الامور طيبه وماصار شي ،، ولاتتـــلوووم بعد ^^

وكلامــك كان منــطقي ( مثل يوم قلت : يعلم ولده صلاهـ )


بعدين يمكن والد الطفل --> عنده ظروووف او محد عنده فالبيت فــ يكون في ظروف تجبرهـ انه ياخذ الولد معاه للمسجد

[محمد ابراهيم البادي]

الموضوع عادي استاذي و ما كان فيه له داعي المشادة

واعتقد انا من حقي اييب ولدى المسجد يصلي ويتعلم الصلاة ويشوف الناس وهو يصلون
واعتقد نحن تربينا على هذا النظام
واعتقد ان الرجل المقابل كان شوي متضايق وفتر غيضه في هالموضوع و اتحمله استاذ فيصل
والله يغفر لنا ذنوب في هاليوم الفضيل

[f-u-j]

انا من رأي انه مافيها شي يعلم ولده ويعوده ع الصلاة ف المسيد بس مايستوي انه كل ما يوديه يقعد يصيح ويخرب ع البقية ..
مب ع حساب الغير يعني مثل ما بيعلمه الصلاه خل يعلمه انه مايزعج بقية المصلين

[فيصل الحوسني]

شاكر لكم كلماتكم الراقية أصحاب السعادة جميعاً، مع اني متأكد انه صلاة المصلين لم تنقطع بسبب صياح الطفل أو مروره أمامهم

[أشكيك لمين]

جزاه الله خير ابو الطفل له اجر عظيم على فعله هذا لكن من الواجب عليه ان يودب طفله ويعلمه الخشوع ويدربه قبل لا يجيبه للمسجد والمفروض يكون بجنبه ويمسكه وقت الصلاة

[عـآشقة القأإنون]

بالعكـس ما فيها شي ويزاه الله الف خير لانه يعلم ولده الصلاة
وانت ماا قلت شي غلط ..

[الحائر]

هي المشكلة موجودة بكل البلاد وليس هناك ما يمنع من اصطحاب الابناء للمسجد لكن عندما ينضج ويفهم انه متواجد فى مكان له قدسيته واحترامه و العبادة لا تقتصر على المسجد فقط فهناك البيت يتعلم فيه اصول دينه الى حين ان يكبر و يعى قدر المكان الذى سيتواجد فيه اتمنى ان يعى كل اب ان المساجد اماكن للعبادة وليست فسحة ولهو للاطفال الغير ناضجين

[وكيل النيابه]

المساجد بيوت الله
وهي لجميع المسلمين
اما بخصوص الرد الاخوان وماقصرو
الاب غلطان ويمكن مش ذنبه لان بعض الاباء من يمسك فيه الياهل مايقدر يزعله
فياخذه وياله المسجد لاكن المفروض انه يجلسه وياه ويكون معلمنه في البيت كيف الصلاه
ويفضل ان يكون يعرف بعض السور
لان الطفل بيخاف وخاصه مع كثرة المصلين
مما قد يشكل تشتيت في الصلاه وخاصه كبار السن من خلال البكاء او لعب بعض الاطفال مع قرنائهم
وفي النهايه نستشهد بكلام خير الانام سيدنا محمد صلى الله عليه وسلم
(( و اموروهم عليها لسبع و اضربوهم عليها لعشر ))


(

[المحامية اسماء الزعابي]

بالعكس استاذ فيصل ماسويت شي غلط

ونفس ماقال بوفاضل يمكن الشخص اللي خديت معاه بالكلام كان ضايج وطلع غيضه فيكم

بس كان المفروض الأب يكون بجنب ولد عسب مايصيح

وموقفك سليم ويعطيك الف عافية

[Prosecuter]

يزاكـ الله خير يا قيصل

عقبال ما تشل عيالك المسجد عشان يصلون وياكـ

هذي امور عادية ممكن تصير في كل مكان

[قانونية وافتخر]

أكيد اللي صار بينك وبينه مشادة كلامية ريال عود ومن اللي دمهم حار .. هع

صح ظاهرة حلوة أن الأبهات ييبون عيالهم للمسيد بس بعد لازم يكون بشروط وضوابط يعني يكون عمر الولد ع الأقل 4 سنين وفوق وعارف إنه رايح المسيد وإنه بيت من بيوت الرحمن ووو.

والأبو المفروض كان يعتذر ع اللي صار ويتوكل أكيد انحرج من الموقف،،وانت ما قصرت خذت حقه..

أما سالفة الكنيسة خطيرة الصراحة..

[فيصل الحوسني]

أشكركم ع كلماتكم الراقية واللي خلتني اتاكد اني انا مب غلطان


ع العموم تراني صدقت عمري،،، ومن احينهـ بجهز العدة لصلاة الجمعة اليايهـ وأي واحد يتحرش في ياهل كرتون بيض ع راسهـ