ما قصرتو والله بس ممكن

[ام خميس]

السلام عليكم ورحمة الله وبركاته

انا صاحبة هالموضوع

http://www.theuaelaw.com/vb/showthread.php?t=8441 (http://www.theuaelaw.com/vb/showthread.php?t=8441)


بغيت اسالكم اذا انا طالبت طليقي مبلغ معين اذا يبى ياخذ الحضانه مني يعني اذا يبى العيال لازم يدفع لي هالمبلغ لاني تميت اصرف عالعيال سنه كامله دخلتهم مدارس وسويت لهم اوراق رسميه ويبت لهم خدامه وما قصرت معاهم بشي انا بطالبه بهالمبلغ بس عشان اوهقه وما اخليه ياخذ الحضانه مني
لاني اعرف هو حالته الماديه تعبانه وما بيقدر يدفع لي يا ريت لو تخبروني ان هشي يستوي او لا


وبارك الله فيكم ووفقكم في الدنيا ولاخره ع المجهود الي تبذلونه عشان تساعدون الناس

[المحامي مؤمن صابر هشام]

ام خميس
صباح الخير

من حقك الحصول على أجر حضانة وأجر مسكن

كما من حقك الحصول على نفقة للصغار وأجر خادمة ومصاريف مدارس


بإختصار

من حقك مطالبته بما انفقتى فضلا عن المصاريف السابقة


تحياتى

[ام خميس]

مشكووور اخوي ربي يسعدك في الدنيا والاخره

ياريت لو تعطوني رقم محامي شاطر في قضايا الحضانه والله يوفقكم

[محمد ابراهيم البادي]

استاذتي الفاضلة
المستشار مؤمن كان حريصا في تقديم الافادة التي رغبتي بها
ولكن الرجاء ثم الرجاء ثم الرجاء
لا تجعلوا من الابناء اسلحة المواجهة بينكما
واما عن الحضانة فهي مسألة تقديرية موكولة للمحكمة تقضي بها لمصلحة المحضون

[ام خميس]

اسمح لي اخوي بس صدقني لمصلحتهم هشي لازم باي طريقه اخذهم منه عشان ما يضيع مستقبلهم

ولو كانت مصلحتهم مع ابوهم كنت بنفسي اتنازل عن الحضانه انت شوف اعمارهم حرام يهال في هالسن وما كانو يسيرون المدرسه حرام ما كانت عندهم اي اوراق ثبوتيه او جوازات واليهال بنفسهم يخافون منه ما يبون يسيرون عنده

وزوجي الحمدلله حالته الماديه ممتازه يقدر يصرف عليهم وزياده وانا بعد الحمدلله عندي محل تجاري خاص فيني

وطليقي حالته الماديه صفر لدرجه ما عنده يصرف على عمره اذا خذ اليهال مني كيف عليهم منو بيشوفهم بروحه ساكن في بيت اخوانه ما عنده اي شي لاهني ولا في بلاده تعتقد ان بهذي الحاله اليهال بيكونون مرتاحين معاه تعتقد ان بيبني لهم مستقبل واهم شي ان هو انسان مريض نفسي معاملته مع عيالي ما كانت زينه بالمره اصلا انا اتطلقت عشان عيالي لما كنت في ذمته حاولت اساعده بكلي الي اقدر كنت اخذ مساعده من اهلي انا بنفسي كنت اداوم عشان اقدر اصرف ع العيال بس الله يستر عليه كل الي سويت انقلب ضدي لين طفح الكيل وتطلقت منه
الحينه انا معيشه عيالي في عز بس لو خذ الحضانه بيردون ع الصفر مستحيل يسوي الي سويته عشانهم وهو لو كان يبى مصلحة عياله كان ما قصر معاهم من البدايه

واسمح لي اخويه لاني طولت والله يشهد على كل كلمه قلتها

[محمد ابراهيم البادي]

استاذتي الفاضلة
اذا كانت هاي حالته فما يقدر ياخذ اليهال
وبعدين مش معناه انج ارتبطتي بزوج خلاص يقدر ياخذهم
هاي مسألة تقديرية للمحكمة
هي الوحيدة اللي تقدر مصلحة الاطفال عندج و لا عند ابوهم

انا كلامي سابقا اقصد فيه ان حرام يدخلون اليهال في هاي الدوامة حتى بالحديث معهم

والله يكون في عونج و عونهم ويبارك في ابوهم الجديد