استشاره حول تقديم بلاغ ضد المسجات

[أم خالد]

السلام عليكم ورحمه الله وبركاته

ياليت تفيدوني بخصوص هالموضوع من شهور تيني مسجات واتصالات

ولحد الحين اعاني منها مع اني غيرت رقمي وطلعت رقم باسم اخوي والرقم الاولي باسم ابوي

بس لازالوا يطرشون طبعا شيء منه سب وانه بيني وبين واحد علاقه ووحده تدعي انه بينها وبين زوجي علاقه وبيتزوجون وخاطبينها لدرجه اتصلوا في اخوي الكبير من رقم شارع وكله افتراء وكذب
وهالمسجات كلها علشان يفرقون بيني وبين زوجي اللي لحد الحين ماكملت سنه وياه من زواجنا وبسببهم المشاكل تصير بيني وبينه صرت اشك بأقرب الناس فيني ونفسيتي تعبانه وايد .. ومرات يعرفون معلومات محد يعرفها يعني مسجات خاصه بيني وبين زوجي لدرجه صرت ماقدر اطرشله وهو نفس الحاله احس مسجاتنها يراقبونها ... المفروض من البدايه اشتكي على الارقام والمسجات انا سيفت المسجات ومحتفظه فيهن ... بس ابا اعرف شو الأجراءات اللي راح تصير لو قدمت بلاغ رسمي واذا طلعت الارقام بأسامي هنود بيقدرون ييبونهم عن طريق الكفيل ؟ واذا رقمي على اسم اخوي لازم هو اللي يروح يبلغ ؟ وهل في احتمال يستدعوني لانه ولا مره في حياتي دخلت مراكز وسمعت انه السالفه عادي توصل محاكم واحتمال اطول ... اتمنى تفيدوني بخصوص هالموضوع :(

[محمد ابراهيم البادي]

يحق لك التقدم بالشكوى على هذه المسجات الى الشرطة وتقديم هاتفك النقال لمعرفة المرسل ووقف نزيف الشك بينك وبين زوجك

[المحامية تمني]

وجودك مهم فأنت الشاكية وصاحبت الامر.. وافضل لك ان تقومي بفتح بلاغ حتى لو لمجرد تخوفيهم حتى ترتاحي من هذه المسجات وابمكانك التنازل عن البلاغ بعد ان يقدمو تعهد لدى الشرطة بعدم ازعاجك .. وارجو منك الاسراع في ذلك لانه مثل هذا الامر يمكن ان يسبب لك مشاكل في حياتك الزوجية مهما كان تفهم الزوج .

[روح وريحان]

مرحب الساع اختي الكريمة


عفؤآ اختي الفاضلة انا ما اشكك بكلامج ابد ولآكن انتي ذكرتي ان المسجات الي طرشيها لزوجكي المصون هم يعرفونها ,, هذا ان دل فيدل ان زوجك له علاقـة مع الاشخاص الي يطرشون لكي مسجات والآ كيف وصلت لهم المسجات .. انا ما اتهم زوجك ولا اتهم احد


قبل ماتبلغي الشرطة شوفي زوجك لانه هو مفتاح حل هذي المشكلة


لان مش معقول تغيري رقمج ويرجعون يطرشون لج مره ثانية ـ من عطاهم الرقم ..؟؟؟ الحين الاجراءات بلاتصالات صارت مشدده لدرجة اذا اشتكيتي على موظف قام ابعطاء اي حد معلومة او رقم يفصل


انا اقول شوفي زوجك لان هو الاساس بهذا الي يحصل لج


واذا مافاد فلقانون رادع لاي شخص يحاول العبث او التعدي على الغير او الازعاج




الله يوفقج ويهدي زوجج

[يوسف آل علي]

السلام عليكم


انا رايي من راي الاخ روح و ريحان و لكني فضلت عدم الرد او ذكر هالشيء لعدم الاحراج

و طالما ان الاخ ذكر الراي فانا معاه

لا اعتقد ان في شخص يقدر يوصل لرقم هاتفج الجديد واللي هو مب باسمج اصلا ، إلا أذا كانت له معرفه شخصية بج

وانتي ذكرتي انهم يكلمونج عن أشياء خاصة صارت بينج و بين زوجج عن طريق المسجات ، فأعتقد إن الزوج له صلة بالموضوع ، لأن اجراءات الاطلاع على تفاصيل المكالمات و الرسائل النصية و غيره عن طريق الاتصالات سرية جدا صعب الحصول عليها إلا بالطرق القضائية

[المحامي مؤمن صابر هشام]

السلام عليكم

فى كل الاحوال اسلم طريقة فتح البلاغ ليعتبر من يقوم بمثل هذه الاعمال

ايا من كان هو مين

[أم خالد]

تسلمون على ارائكم يزاكم الله خير

من كلامكم بديت اتاكد انه السالفه لها دخل بوحده من زوجاته لأني أنا الثالثه

أنا كنت شاكه بس ماحبيت اسوي مشاكل ... وأن شاء الله بقدم بلاغ عما قريب

والله فوق بياخذ حقي منهم

[ام بسام]

لا إختي ،أنا في وحده تلحقني من سنين ،وتزعجني بمسجات ومكالمات وطلعت على قد ماطلعت من أرقام وماكنت أقصد أني أغير بس مرات ينغلق بسبب كود غلط وما أو تضيع وكلها ماتكون بإسمي ،بإسم خواتي ورياييلهم أو حد غير ومع هذا دايما أشوف مسجات منها أو مكالمه من طرفها .عشان جي الأفضل إنج تتجهين إلى الشرطه وإتقدمين بلاغ ،وبعدين ريلج دامنه عنده ثلاثه ماشاء الله يعني أكيد حاط كود ،فكري ولاتتهورين ،سلام

[mohd866]

اختي الفاضلة ما نوع المسجات ؟ عسب نرشدك للطريقة المثلى

[روح وريحان]

لا إختي ،أنا في وحده تلحقني من سنين ،وتزعجني بمسجات ومكالمات وطلعت على قد ماطلعت من أرقام وماكنت أقصد أني أغير بس مرات ينغلق بسبب كود غلط وما أو تضيع وكلها ماتكون بإسمي ،بإسم خواتي ورياييلهم أو حد غير ومع هذا دايما أشوف مسجات منها أو مكالمه من طرفها .عشان جي الأفضل إنج تتجهين إلى الشرطه وإتقدمين بلاغ ،وبعدين ريلج دامنه عنده ثلاثه ماشاء الله يعني أكيد حاط كود ،فكري ولاتتهورين ،سلام




اهلا وسهلا اختي الكريمة


عذرآ أختي الكريمة كلامج غير منطقي بلمره

[أم خالد]

لا إختي ،أنا في وحده تلحقني من سنين ،وتزعجني بمسجات ومكالمات وطلعت على قد ماطلعت من أرقام وماكنت أقصد أني أغير بس مرات ينغلق بسبب كود غلط وما أو تضيع وكلها ماتكون بإسمي ،بإسم خواتي ورياييلهم أو حد غير ومع هذا دايما أشوف مسجات منها أو مكالمه من طرفها .عشان جي الأفضل إنج تتجهين إلى الشرطه وإتقدمين بلاغ ،وبعدين ريلج دامنه عنده ثلاثه ماشاء الله يعني أكيد حاط كود ،فكري ولاتتهورين ،سلام


اختي ريلي ماعنده كود وهالشيء متأكده منه ..يعني أي حد ممكن ياخذ الموبايل

ويشيك منه أذا هو مش منتبه ... أنا طبعي أنسانه مسالمه ماقد ضريت حد وهالمسجات ماطلعت إلا بعد

ماعرست وماحب اسيء الظن بس في نفس الوقت في أشياء الواحد لازم ياخذها بعين الأعتبار ومايتغافل

عنها

[أم خالد]

اختي الفاضلة ما نوع المسجات ؟ عسب نرشدك للطريقة المثلى

في البدايه كانت المسجات على أساس أنه واحد يحبني ومنصدم كيف أهلي وافقوا على واحد متعدد

وأنه زميلي في الدوام طبعا أنا على طول قدمت أستقالتي بعد ماعرست ومستحيل يكون واحد من الدوام

ويعرف الأوقات الي يكون ريلي محد فيها واللي وياي في الدوام الشباب مايعرفون منو ماخذه ومايعرفون بالأشياء الخاصه فيني ... طبعا عقب قام يطرش في الأوقات اللي يكون ريلي فيها موجود بس الحمد لله ريلي واثق فيني وفي اخلاقي ويوم حاول يتصل فيه يعطيه مغلق وفي النهايه طلع بأسم هندي

وبعد فتره قامت وحده اطرش انها خطيبته وبيتزوجون في تاريخ معين وعقب اتصلوا من رقم شارع على اخوي وكان واحد اونه علشان يتأكدون أني موافقه ولالا وانه ريلي خاطب اخته طبعا هالشيء مستحيل يدش المخ لانه مامر على زواجي إلا كم شهر بس ..

وعقب غيرت رقمي وبعد فتره اتصل واحد فيني وانا استغربت الرقم ورديت قالي انتي زوجة فلان قلت هيه انا خفت قلت صاير شي عقب قام يغلط على ريلي واونه ريلي راعي بنات ويباني اعطيه ايميلي وانا سكرت في ويه ويلس يقول عنده دليل انه ريلي يغازل في الشات مع اخته ومادري شو طبعا ريلي مش من هالنوع لأنه انسان ملتزم والكل يعرف اخلاقه وطبيعة شغله مستحيل يفضى حق هالخرابيط طبعا سالفة انهم يبون ايميلي اتكررت في المرات السابقه للمسجات الأوليه واونه بيطرشون اوراق لحد البيت وطبعا كله جذب لاطرشوا ولا شيء

وعقب قامت وحده اطرش ولازالت ... تغلط علي وعلى اهلي وتسبني وتعرف كل شيء عني وعن تحركات ريلي

[المحامي مؤمن صابر هشام]

سيدتى

موضوع بسيط لا يحتاج أن تقلقي كل هذا القلق

كما قلتى أن الرسائل تأتيك على هاتفك الجوال

والطبيعى ان هناك ارقام تظهر على الشاشة مصاحبة للرسايل

عليك التوجه الى قسم الشرطة للبلاغ عن صاحب الرقم

او ممكن أن تأتى هذا الرقم لأى احد من اخوانك يتصلوا عليه ويعرف من هذا الشخص


طرق القضاء على مثل هذه الحالات كثيرة كما ذكرت من قبل

تحياتى

[أم خالد]

المحامي مشكور أخويه

المشكله أنه يوم يتصلون عليهم يايعطيهم مغلق أو يرن ويكون

محول على رقم ثاني ... حاليا أخوي اللي رقمي على أسمه راح لمركز الشرطه

علشان يفتح بلاغ وإن شاء الله خير

[abudhabi]

حتى لو باسم شخص هندي

اطلبوا البحث برقم التسلسل الخاص بالجهاز الذي استخدمت فيه البطاقة المتسببة بالازعاج ويظهر من اتصالات بان البطاقة قد زضعت بجهاز رقمه التسلسلي كذا ويمكن معرفة مالك الجهاز

وكذلك باستخدام خاصية تحديد المواقع لرقم البطاقة بحيث تعرف مكان تواجد الشخص صاحب الرقم في اي منطقة كان

يظهر كشف بانه عندما قام بالاتصال قبل ثلاثة ايام كان بمنطقة جميرا مثلا وعندما قام بالاتصال الثاني كان بالراشدية مثلا وهكذا يتم محاصرته ومعرفته عن طريق التحريات

[ام بسام]

اختي ريلي ماعنده كود وهالشيء متأكده منه ..يعني أي حد ممكن ياخذ الموبايل

ويشيك منه أذا هو مش منتبه ... أنا طبعي أنسانه مسالمه ماقد ضريت حد وهالمسجات ماطلعت إلا بعد

ماعرست وماحب اسيء الظن بس في نفس الوقت في أشياء الواحد لازم ياخذها بعين الأعتبار ومايتغافل

عنها

أكيد كلامج صح ،بس مداخلتي هذي كانت لتأكيد إنه ممكن يطلع حد أرقام ثانيه تستخدمينها حتى لو ماكانت بإسمج ،وهذا إستنتجته بإلي صار معاي ،المهم الغاليه أنا مش مؤهله للإجابه على أي إستشاره بس أرد لمواقف أشوفها إتشابه مواقفي وأترك الإجابه للي أخبر مني ،وهذا هم ذوي الخبره كلهم أكدوا إنه لازم تلجئين للشرطه وأستاذ أبوظبي كان جوابه كافي ومطمن لج بأن مين ماكان الأشخاص إببعرفونهم وبيرتدعون وإن شاء الله بترتاحين منهم:).سلام

[المحامية الغلا]

اتبعي الطريق الصحيحة (القضاء)