$/$ نفـوس معلـولـة $/$

[رفعت الجلسة]

الســـلام عليـــكم ,,
قصيدة حاولت أعبر فيهـا عن مدى استيـائي من حب البشر للمال و اللهث المتواصل و المستمر وراء الماده الذي غالبا ما ينتهي إما خلف القضبان و أو تحت الثـرى !



نفوس معلولة



كلامي الليلة أصعب كـــلام بقولــه

تبعثرني حروفه و تلجـــم لســـاني



كلامي ماهو عن العشق و فصوله

كلامي أسمى عن كل ذيك المعاني





أبسرد اليوم قصة نفـــوس معلولة

بحب الدراهم و صغار الأمـــانـــي





لجل الدراهم تلقى بشـــر مذلـــولة

و في حبها تلقى نفـــوس تـــعانـــي





و في نيلهـــا كل الجهود مبذولـــة

حتى الطفل لجلها صـــار متفـــــاني





المال سكين الغدر الناس به مقتوله

طعنته سكنت بين الضلوع المحاني





الخوي ينهش لحم أخوه بسهولــه

بايعٍ خوتـــه في عـــدة ثــوانـــي





و تلقى الإبن يده بالدم مغســـوله

يذبح أبوه في لحظة إجرام شيطاني





نفـوس البشر ماعادت اليوم معقولـــه

تركض ورا الماده في كل مكان وزمانِ





عوج الطرق تسلك ماهيب مسؤوله

و بدهاليز الحرام مشت بلا وجداني





قامت تبيع أحلام و طهر الطفولـــه

و اتـــاجر بها بأبخس الأثمانـــي





يا ابن آدم لا تمشي بسكة مجهولة

و لا تغرك الدنيا ترا هالعمر فاني





أنانية البشر خلتني اليوم مذهولة

و هذي رسالتي لكل شخص أناني







و ســــــــــــوالــــم :d

[دبلومآسية]

صــح لسآنج حبوبه ع القصيده الجميله
وللآسف زمنه صآر زمن المادة والفلوس
وصج يوم قال المثل الفلوس تغير النفوس
بس ما نقول غير الله كريم

[ام بسام]

بصراحه القصايد إلي تكتبينها ماتبين أبدا إنها وحده مبتدئه كاتبتنها.. ماشاء الله عليج ،أنا ألقى نفسي أندمج معاها ،كلمات جميله ومعانيها أجمل ،الله يوفقج :)

[غلا2010]

نفـوس البشر ماعادت اليوم معقولـــه


تركض ورا الماده في كل مكان وزمانِ
قصيده جميله ومعبره
و ان المال يغير نفوس البشر وتسلمين ع الطرح

[رفعت الجلسة]

تسلمــوووووون .. كلكم ع المــرور الغــاوي ..

مشكوورين و ما قصرتوا على الردود الطيبة ^^

[بوحمدان]

صح لسانج شاعرتنا ولا هنتي وصح منطوقج
أتمنى ما تبخلين علينا بأي يديد

[رفعت الجلسة]

صــح بدنك أخوي بــو حمـدان ..

ولاهنت ع المرور و الـرد الطيب .. مشكور