بلاغ شيك بدون رصيد. ووصل أمانه بنفس المبلغ وفاتوره

[حاير]

السلام عليكم ورحمة الله وبركاته أخواني الكرام أرجو حد يفيدني أنا أستأجرت سياره من مكتب تأجير لمدة سنه كان اتفاقي مع صاحب المكتب يوميا 200 درهم لكن يوم رحت استلم السياره كان العقد مكتوب فيه 250 اتصلت به قالي ما عليك انته إذا خذتها اكثر من 6 شهور بحاسبك علا 200 لليوم خذت السياره وكنت ادفع بين فتره وفتره وبلغ مجموع دفعاتي في حدود 38000 اتصلوا بي قالوا تعال سلم السياره رحت المكتب سلمتهاوكان في جيبي7500 دفعتهن المهم حسبوا الحسبه علا 250 لليوم واتصلت لصاحب المكتب وقالي نحن نمشي علا العقد ما بطول عليكم الجماعه اللي في المكتب واحد من جنسيه عربيه والثاني أسيوي رفضوا السماح لي بالخروج من المكتب لين وقعت الهم علا شيك بالمبلغ المتبغي وبدون تاريخ وايصال أمانه بنفس المبلغ واول ما طلعت من المكتب اتصلت لواحد من الربع خبرته الموضوع وعطاني رقم محامي اتصلت به وقالي تعالي المكتب رحت له وسويت له وكاله الجماعه قدموا الشيك ورجع وقدم عريضه لوكيل النيابه ووكيل النيابه وجه كتاب لمركز الشرطه التابع للمنطقه اللي فيها مكتب التأجر ورحت وخذوا أقوالي وطلعت الكلام هاذا كان تاريخ 26/2/2013 أنا انشغلت علا بالي انه المحامي يتابع الموضوع تفاجأت متصلين بي تاريخ 11/3/2013 نفس المركز اللي أنا فاتح فيه البلاغ وقالوا لي عليك بلاغ شيك مرتجع راجعنا بكرا قلت الهم ان شاء الله اتصلت أسأل عن بلاغي وقالوا لي في قسم التحقيق أنه تحول للتحريات بعد نص ساعه من اتصال المركز بي يخبروني انه عليه بلاغ اتصلوا بي التحريات في نفس المركز وقالوا لي البلاغ اللي انته قدمته ناقصه صورة الهويه وقلت الهم أنا متأكد صورة الهويه موجوده قالوا لي لا مش موجوده هاتها النا بكرا قلت الهم ان شاء الله رحت ثاني يوم واول ما وصلت قلت بطلع بعطيهم صورة الهويه وبعدين بنزل اشوف البلاغ اللي عليه الجماعه من وصلتهم فوق مسكوني ودخلوني النظاره المهم طوال الفتره وانا اتواصل ويا المحامي ولكن لا حياة لمن تنادي محد جاني في المركز مع أاني علا تواصل وياه أول بأول وقبل لا ادخل النظاره خبرته بأني بدخل النظاره وما عندي تيليفون خذوا أغراضي وقالوا لي بنعرضك باجر علا النيابه وخبرته فليل اتصلت به من تيليفون اللي برع وخبرته بضرورة حد اييني باجر النيابه قالي بنكون معاك والصبح محد جاني ورحت النيابه وانعرضت علا القاضي روحي محد ياني وخبرته القاضي قلت له أنا مجبر علا توقيع الشيك وأنا فاتح بلاغ من اسبوعين وعطيته رقم البلاغ وطلبت كفاله لتسوية الموضوع وعطاني شهر سامحوني طولت عليكم استفساري هل يقدر صاحب المكتب يفتح بلاغ ثاني بايصال الامانه أول الفاتوره وشو عقوبة ايصالا الامانه في محاكم بوظبي وشو تنصحوني اسوي بخصوص المحامي ارجوا انكم تساعدوني مع العلم بأني حاس أنه بلاغي متعمدين يأخرونه في مركز الشرطه قالوا لي انه صاحب المكتب واحد من اهله موجود هناك ومش معقوله بيتم اسبوعين ما يرسلونه للنيابه انصحوني يا جماعة الخير الله ييزيكم خير

[عادل العاجل]

نفس الحركة .. كأنها عرف مبينهم يقول لك الإيجار ب مائة و يسجل على الورق 120 درهم .. نصب

[سعود المطوع]

السلام عليكم ورحمة الله وبركاته

أخي السائل،

بالنسبة للفاتورة، فنعم، يستطيع أن يتقدّم ببلاغ آخر به، وذلك عن تهمة "الامتناع بغير مبرر عن دفع أجرة مركبة معدّة للإيجار" .

لكن ما دام الشيك قد حُرَّر لذلك السبب تحديدًا، فعليك أن تطلب من النيابة العامة ضم ملف البلاغ الجديد بملف الدعوى الأصلي وذلك على سند وجود ارتباط ماديّ لا يقبل التجزئة بين جريمتيّ إعطاء شيك بدون رصيد وبين الامتناع عن دفع أجرة مركبة، لأنك حررت الشيك كسداد للأجرة. فتقوم النيابة العامة بالضمّ، وعلى المحكمة بعد ذلك أن تحكم بعقوبة الجريمة الأشد وحدها دون عقوبة الجريمة الأخرى. وسبب إمكانية التقدّم ببلاغ آخر هو أن الجريمتين عبارة عن واقعتين مختلفتين .

عقوبة جريمة الامتناع عن الدفع:
1. الحبس الذي لا يزيد على 6 أشهر .
2. الغرامة التي لا تجاوز 5 آلاف درهم .
3. العقوبتان"1" و"2" معًا .

عقوبة تحرير شيك بدون رصيد:
1. الحبس (من شهر إلى 3 سنوات) .
2. الغرامة (من 1000 درهم إلى 30 ألفًا) .

وكان عليك أخي السائل ألا تقبل عقد الإيجار وألا توقـّـع عليه إلا بتعديل ثمن الأجرة بناءً على ما اتفقتما عليه شفاهةً، وكان عليك ألا توقـّـع الشيك وأن تبلغ الشرطة فورًا بمجرّد حجز حريّتك ومنعك من الخروج من المكتب.

هذا بشكلٍ عام .

أخوكم

سعود المطوع

[حاير]

مشكور يا سعيد ويزاك الله خير. وبخصوص وصل الأمانه نفس الشي إذا فتح بلاغ به ينظم بعد ؟ وشو تشور عليه أنا تكفلت سهر وطلعت هل اتواصل وياهم واوصل لتسويه وياهم وألغي بلاغي لأنه ما منه فايده ولا أخلي البلاغ ماشي لأني أنا خبرت القاضي أني مجبر علا التوقيع وأني سبق وفتحت بلاغ بهذا الشي من اسبوعين وعطيته رقم البلاغ اللي أنا فاتحنه