دخيلكم .. آبي شوركم !!!

[بنت لندن]

السلام عليكم ورحمه الله وبركآته ..
آشحالكم عسآكم بخير وسهاله ..


اتمنى انكم اتفيدوني في مشكلتي ..
انا ابوي متوفي من فتره وكآن مآخذ حرمتين ..
استوت وآآيد مشآكل بخصوص الورث ..
ومشآكلي زآدت وآآآيد مع آهلي بخصوص دراستي ..
وخصوصآ مع آخوآني من آبوي..
وهم يبون يغصبوني آخذ وآآحد هب متعلم ..
وخلاص انا تعبت من الوضع الي انا عايشته ..
وهب رايمه آاتحمل زود ..


وابي اطلع من البيت وآعيش بروحي بشقه ..
انا هب معرسه وعمري 23 سنه ..
ادآوم وآدرس مآستر في آبوظبي ..
ووضعي المآدي وآآيد آوكيه ويسمحلي اني اعيش بروحي ..
ومستعده اتنآزل عن كل حقوقي في املاك الوآلد الله يرحمه ..


فـ بغيت آعرف اذا يستوي آطلع وآعيش بروحي ولا لا ؟!!

[محمد ابراهيم البادي]

الوردة دائما تكون جميلة في الباقة التي تجمعها بزهور مثلها
فالعصبة دائما ودائما تكون في مواجهة الصعاب

لا تعقدين انج بتقدرين تعيشين روحج وبعيد عن هلج
الانسان اول ما يتعور يزقر اخوه من الالم بكلمة اخ
شوفي يابنت الناس حاولي تتواصلين معاهم وتتفاهمين وياهم على كل الامور بدون الحزازية والزعل والبعد
وبعدين نحن وين عايشين ان البنت تظهر من بيت هلها وتعيش روحها في شقة
اعتقد عاداتنا وتقالدينا ما تسمح بهاي الاشيا
عيدي التفكير اكثر في الوصول الى نتيجة مرضية

[بنت لندن]

وربي آدري والكلام الي اتقوله على عيني ورآسي ..
بس الوضع الي انا عايشه فيه متعبني وآآيد و انا ماآفكر آعرس الحين ..


ابي اكمل دراستي وايمع شهآيد واستوي شي وآآيد مهم في البلاد ..
وهم يتريوني اخلص وعالكورس اليآي بيوزوني وآآآحد هب متعلم واكبر عني ..


ولا مايبآني لا آدرس ولا آشتغل ولا آسوق عسب جذي ابي آعرف يستوي ولا لا ؟!
ماابي اتم حآطه الفكره في بالي وآخرتهآ انصدم واتحطم ..
ابي اعرف من الحين عسب اذا مايستوي آجوف شو ممكن آسوي آو اتقبل الآمر الوآقع ..

[محمد ابراهيم البادي]

استاذتي الفاضلة
انت مش مجبورة على الزواج بواحد ما تريدينه
اعتقد تقدرين تقولين هاي الكلمة حق هلج او القاضي او المليج
انا ما اريد الارتباط بواحد في هذا الوقت او من هذا الشخص
مازال الوضع امامك في الدفاع عن نفسك وليس بالهروب بحثا عن القيل والقال
انت انثى استاذة وحافظي على سمعتج وسمعة والدج الله يغفر له

[رمضان حمزة]

أحسنت الرد أستاذي الفاضل محمد البادي وجزاك الله خيراً وفي ميزان حسناتكم بإذن الله تعالى ونرجو من الأخت الكريمة أن تصغي للنصيحة الغالية في زمن ندر فيه النصح لوجه الله تعالى والله يوفقنا جميعا لما يحبه ويرضاه

المستشار القانوني / رمضان حمزة

[محمد حسين إدريس أحمد]

صدقت استاذى رمضان لك التحية ولاستاذنا البادى وجزاكم الله خيرا

[واحد من الناس]

‏ يابنت لندن لا تأكل من الغنم الا القاصية صح لسانك يا بادى ‏

[اللحيفي]

اختي بنت لندن
بخروجج من البيت تعطين اخوانج المبرر انهم يجبرونج على الزواج ممن رشحوه لج ومثلما قال استاذنا محمد البادي انه ما فيه شي عندنا بنت تتطلع وتسكن بروحها وين احنا عايشين الناس ما ترحم وبعدين انت كبنت صعب جدا تسكنين بروحج ويمكن مواجهة المشكلة بشي من التعقل والتروي وانت استاذتي تكملين ماستر ...يعني ناضجة فكريا
الله يوفقج اختي ويهدي سرج ويهدي اخوانج

[محمد ابراهيم البادي]

وبعدين في محاولة بسيطة يمكن تخفف عليج العبء في هاي السالفة
سيري التوجيه الاسري في المحكمة واعرضي عليهم السالفة وخليهم يتواصلون مع اخوانج وتوصلون لحل لهاي السالفة بعيد عن الانتقال وبعيد بعد عن لغوة الناس عليج

اهم شي انج تشدين حيلج ف الدراسة الحين